1 маусым – Халықаралық балаларды қорғау күніне орай Түркістан облысы, Арыс қаласында ерекше мейрам ұйымдастырылды. Т.Тәжібаев атындағы отбасы үлгісіндегі балалар ауылында өткен бұл мерекелік шара еліміздің болашағы – балалардың жарқын келешегі мен бақытты балалық шағын қамтамасыз етуге бағытталған игі бастамалардың бірі ретінде ұйымдастырылды.
Шара «AMANAT» партиясының «Бақытты отбасы» жобасы аясында өткізілді. Аталған жоба еліміздегі отбасылық құндылықтарды насихаттауға, ата-ананың рөлін арттыруға, балалардың жан-жақты дамуына қолдау көрсетуге арналған. Бұл жолғы іс-шараның басты мақсаты – балалардың мерекесін ерекше етіп өткізу, оларға қуаныш сыйлау, рухани қолдау көрсету және олардың әлеуетін ашуға мүмкіндік беру болды.
Іс-шараға «AMANAT» партиясы Түркістан облыстық филиалы атқарушы хатшысының орынбасары, облыстық мәслихат депутаты Қалыйма Жантөреева, сондай-ақ Арыс қалалық партия филиалының төрағасы Бақтығали Ділдәбеков арнайы қатысты. Қонақтар балаларды шын жүректен мерекемен құттықтап, олардың шаттықты күлкісіне ортақтасып, жылы лебіздерін білдірді.
Мерекелік кеш барысында балалар арнайы дайындаған концерттік бағдарламаны ұсынды. Ән шырқап, би билеп, өлең оқыған бүлдіршіндердің өнері келген қонақтарды тәнті етті. Балалардың шынайы көңілмен көрсеткен шығармашылығы – олардың болашаққа деген сенімі мен өз-өздеріне деген құрметін арттыратыны сөзсіз.
Қонақтар бүлдіршіндердің өнеріне жоғары баға беріп, алғыстарын білдірді. Балалардың қуанышты сәттері олардың жүректеріне ерекше әсер қалдырды.
Партия өкілдері бүлдіршіндерге арналған тосынсыйлар әзірлеп, әр балаға қуаныш сыйлады. Бұл сәт балалардың жүздерінде бал-бұл жайнаған күлкі сыйлап, көңіл күйін көтерді. Сонымен қатар, «AMANAT» партиясы жанындағы «Әйелдер қанатының» облыстағы жетекшісі Қалыйма Жантөреева мектеп бітіріп жатқан түлектерге арнайы дайындаған сәнді киімдер топтамасын – «Бойжеткен» сериясын тарту етті.
Бұл топтамадағы көйлектер мен салтанатты киімдер ұлттық нақышта өрнектеліп, ерекше сән-салтанатпен тігілген. Қолөнермен безендірілген бұл киімдер бітіруші қыздарға мерекелік кеште көз тартарлық сән мен өзіндік ерекшелік сыйлады. Бұл – балалардың өзіндік стилін қалыптастырып, өз-өздеріне деген сенімділіктерін арттыруға бағытталған ерекше қадам.
Іс-шара барысында партия мүшелері балалар ауылын аралап, ондағы әрбір отбасы моделінің тұрмысымен, балалардың күнделікті тіршілігімен танысты. Балалар өз қолдарымен жасаған қолөнер бұйымдарын, суреттерін және әртүрлі шығармашылық жетістіктерін көрсетіп, қонақтардың ризашылығына бөленді. Бұл жұмыстар – олардың шығармашылық әлеуетінің жоғары екенін, болашақта үлкен жетістіктерге жетуіне толық мүмкіндік бар екенін көрсетті.
Қазіргі таңда Т.Тәжібаев атындағы отбасы үлгісіндегі балалар ауылында 7 отбасы бар, оларда жалпы 61 бала тәрбиеленуде. Әр отбасы ұлттық және рухани құндылықтарға негізделіп, ата-аналық қамқорлықпен құрылған. Бұл мекеме балалар үшін тек қана баспана емес, сонымен қатар махаббат пен мейірімге толы отбасы атмосферасын сыйлайтын орта болып отыр. Мұнда әрбір бала жеке тұлға ретінде дамып, өзіне сенімді азамат болып қалыптасуына мүмкіндік алады.
«AMANAT» партиясының бастамасымен жүзеге асып жатқан «Бақытты отбасы» жобасы – еліміздегі әрбір баланың құқықтарын қорғау, олардың өмір сүру сапасын арттыру және толыққанды отбасылық ортада тәрбиеленуіне жағдай жасауға бағытталған. Бұл жолғы іс-шара – осы жобаның нақты іске асырылып жатқан табысты қадамдарының бірі.
Жалпы, мұндай игі шаралар арқылы партия балалардың тұлғалық дамуына, олардың бақытты болашағына, қоғамдағы белсенді азамат болып өсуіне үлес қосып келеді.