Түркістан қаласында 2025 жылы «Өңірлік жұмыспен қамту картасы» аясында ауқымды жұмыстар жүзеге асырылды. Жыл басында белгіленген 11096 жаңа жұмыс орнын құру жоспары бүгінде 117,4 пайызға орындалып, өңірдің еңбек нарығын тұрақтандыруда айтарлықтай нәтижелерге қол жеткізілді. Жұмыс орындары ұлттық жобалар мен жеке инвестициялық бастамалар, «10 мың тұрғынға 100 жаңа жұмыс орны» бағдарламасы, жұмыспен қамтудың белсенді шаралары және еңбек нарығындағы бос жұмыс орындары есебінен қалыптастырылды. Осы бағыттардың әрқайсысы халықты тұрақты және уақытша жұмыспен қамтуға, жаңа кәсіпкерлік бастамаларды қолдауға және әлеуметтік санаттағы азаматтарға мүмкіндік беруге ықпал етті. Бұдан бөлек, жаңа бизнес-идеяларды іске асыру үшін мемлекеттік гранттар бөлініп, әлеуметтік осал топтарға арналған квоталар жүзеге асырылды. Бос жұмыс орындары жәрмеңкелері жұмыс берушілер мен жұмыс іздеушілерді байланыстырып, тұрғындардың еңбек нарығына жылдам бейімделуіне жағдай жасады.
Осы ретте біз Мансап орталығының директоры Жангелді Әбіләзіммен жүргізілген сұхбат негізінде 2025 жылғы жұмыспен қамту картасының орындалуы, гранттар, субсидияланатын және тұрақты жұмыс орындары, жәрмеңкелер мен әлеуметтік квоталар бойынша толық әрі нақты деректермен танысқан едік.
— Жангелді мырза, ең алдымен, 2025 жылдың Түркістан қаласы үшін еңбек нарығындағы жалпы ахуалына тоқтала кетсеңіз. Осы жылы қалада қанша жаңа жұмыс орны ашылып, бұл көрсеткіш жұмыспен қамту саласындағы қандай өзгерістерге жол ашты?
— 2025 жылы Түркістан қаласында «Өңірлік жұмыспен қамту картасы» аясында жалпы 11096 жаңа жұмыс орнын құру жоспарланған болатын. Бұл көрсеткіш өңірдің экономикалық дамуы мен азаматтардың әлеуметтік әл-ауқатын жақсарту мақсатында қолға алынған маңызды шаралардың бірі болып табылады. Бүгінгі күнге дейін жүзеге асырылған жұмыстар нәтижесінде жоспар бойынша құрылуы тиіс жұмыс орындарының 117,4%-ы орындалып, Түркістан қаласы облыс бойынша ең жоғары көрсеткішке жетті.
Жұмыс орындарын ашу тек сандық көрсеткішпен шектелмей, бірнеше негізгі бағыт бойынша жүзеге асырылды: ұлттық жобалар мен жеке инвестициялық жобалар арқылы жаңа тұрақты жұмыс орындары құрылды, Мемлекет басшысының тапсырмасына сәйкес «10 мың тұрғынға 100 жаңа жұмыс орны» бағдарламасы шеңберінде қосымша мыңдаған орындар ашылды, жұмыспен қамтудың белсенді шаралары арқылы әлеуметтік топтарға жұмысқа орналастыру жүргізілді, сондай-ақ еңбек нарығындағы бос жұмыс орындарына жолданған азаматтар саны артты.
Осының нәтижесінде 2025 жыл ішінде Түркістан қаласында тұрақты және уақытша жұмыс орындары құрылып, жалпы 13027 азамат жұмыспен қамтылды. Оның ішінде 9718 азамат тұрақты, ал 3309 адам уақытша жұмысқа орналастырылды. Бұл көрсеткіш жұмыс орындарын құру жоспарының тек орындалуын ғана емес, сонымен қатар қаланың еңбек нарығын белсенді ету мен әлеуметтік тұрақтылықты қамтамасыз етудегі тиімділігін де көрсетеді.
Сонымен қатар, жаңа бизнес-идеяларды іске асыру үшін мемлекеттік гранттар бөлініп, әлеуметтік осал топтарға, оның ішінде мүгедектігі бар азаматтарға, көп балалы отбасыларға және асыраушысынан айырылған азаматтарға қосымша қолдау көрсетілді. Барлық осы шаралар Түркістан қаласының жұмыспен қамту саласындағы прогрессивті және кешенді саясаттың нәтижесі болып отыр.
— Жұмыс орындарын ашу биыл Түркістан қаласында қандай негізгі бағыттар бойынша жүзеге асырылды және әр бағыттың мәні қандай?
— Жұмыс орындары 2025 жылы Түркістан қаласында төрт негізгі бағыт бойынша құрылды. Біріншіден, ұлттық жобалар мен жеке инвестициялық жобалар шеңберінде 335 жаңа жұмыс орны ашылды. Бұл бағыт өңірдегі ірі инфрақұрылымдық жобаларды іске асыру арқылы тұрақты жұмыс орындарын құруға, экономикалық өсімді қолдауға және кәсіби мамандарды тартуға бағытталған.
Екіншіден, «10 мың тұрғынға 100 жаңа жұмыс орны» бағдарламасы аясында 2220 жұмыс орны құрылды. Бұл мемлекеттік бағдарлама халықтың әлеуметтік әл-ауқатын жақсартуға, әсіресе жаңа буын мен жұмыссыз тұрғындарды жұмыспен қамтуға ерекше мән береді.
Үшіншіден, жұмыспен қамтудың белсенді шаралары арқылы 3734 азаматқа жұмыс ұсынылды. Бұл шара жастар, мүгедектігі бар азаматтар, көп балалы және асыраушысынан айырылған отбасылар сияқты әлеуметтік осал топтарды жұмыспен қамтамасыз етуге бағытталған.
Төртіншіден, еңбек нарығындағы бос жұмыс орындары арқылы 4678 адам жұмысқа орналастырылды. Бұл бағыт қаладағы жұмыс берушілер мен жұмыс іздеушілер арасындағы байланысты нығайтып, еңбек нарығын тиімді етуге және азаматтарға қажетті мамандықтар бойынша тұрақты жұмысқа қол жеткізуге мүмкіндік берді. Осы төрт бағыт бірлесіп, Түркістан қаласының жұмыспен қамту саласында кешенді және нәтижелі саясат жүргізілетініне дәлел болды.