Бұл күн - пандемиямен күресте халқымыздың бірлігі күні болу керек

Бұл күн — пандемиямен күресте халқымыздың бірлігі күні болу керек

3 просмотров

Бұл күн - пандемиямен күресте халқымыздың бірлігі күні болу керек

Мемлекет басшысы Қасым-Жомарт Тоқаев пандемиямен күрес және отандастарымыздың денсаулығын қамтамасыз ету мәселесін әрқашан жіті бақылауда ұстап отыр. Күллі адамзатты зақымдаған COVID-19 індеті өте ауыр әрі жауыз тұрпатта ортаға шықты. Бұл аурудың емі мен оған қарсы вакцинасы әлі табылмады. Сондықтан, әлемдегі дамыған елдерді қоса алғанда көптеген мемлекеттерде бұл індет мыңдаған адамның өмірін қиюда. Өкінішке орай, бұл қайғы бізді де айналып өтпеді. Арамызда осы ауру кесірінен жақындарынан, таныстарынан, әріптестерінен айрылған жандар да аз емес. Індет жас кәріге қарамастан адмдардың өмірін қылыштай қиып жатыр.
Сондықтан, 13-шілде — Президентіміз жариялаған жалпыұлттық аза тұту күнінде бұл жауыз індеттен көз жұмғандарды еске алып, отандастарымыздың жаны мен денсаулығын сақтаймын деп өмірден озған медицина қызметкерлеріне тағзым ету баршамыздың парызы! Бұл күн — пандемиямен күресте халқымыздың бірлігі Күні болу керек. Сонымен қатар, біздер үшін отандастарымыздың, олардың туыстарының және әріптестерінің өмірі мен денсаулығын сақтаудағы жауапкершілікті түсіну күні болу керек.
Президент Қасым-Жомарт Тоқаев, халқымызға арнаған мәлімдемесінде пандемияға қатысты қоғамды алаңдататын барлық мәселелерге егжей-тегжейлі тоқталды. Президентіміз елімізді дағдарыстан іс жүзінде шығаратын нақты пандемиямен күрес бағдарламасын ұсынды. Бұл үшін бюджеттен қомақты қаржы бөлінуде. Үйде медициналық қызмет көрсету үшін 3,5 мың мобильді топ құрылатын болды. Аурухана жатақтарының саны 43 мыңға дейін жеткізіледі. Короновирусты анықтауға арналған ПТР (ПЦР) сынақтарының саны күніне 40 мыңға дейін артатын болды. Бұл — инфекцияны дер кезінде анықтауға және аурудың пневмония сатысына жетуінің алдын алу мақсатында тиісті медициналық көмек көрсету шараларын қабылдауға мүмкіндік береді.
Президентіміз дәрі-дәрмекпен қамтамасыз ету мәселесіне ерекше назар аударып отыр. Бұл отандастарымызды ерекше толғандыратын мәселе. Өкінішке орай, елімізде пневмонияны емдеуге арналған дәрі-дәрмектердің бағасын асыра көтермелеп, жасанды дәрі-дәрмек тапшылығын тудыратын және өз бизнесін адамдардың қайғысына құратын кәсіпкерлердің де бар екені баршамызға мәлім. Бұл салада, Мемлекет басшысының тапсырмасына сәйкес ең жақын мерзімде тәртіп орнатылады. Сонымен қатар, парацетамолдың 800 мың пакеті сатып алынғанын және дәріханаларға жеткізілгенін, оған қоса апта соңына дейін 900 мың пакеті алынатыны айтылды. 150 мың пакет антибиотиктер алынып, дәріхана қатарларына жеткізілуде. Бұл, жақын арада, індетпен күрестегі негізгі дәрі-дәрмектерге деген аса көп сұраныстың төмендеуіне себеп болады деп үміттенуге мүмкіндік береді. Президент айтқандай, жалпы алғанда дәрі-дәрмектер мен тыныс алу аппараттарын сатып алуға, медицина қызметкерлерін ынталандыруға және басқа да шараларға 150 млрд. теңге бөлінеді.
Президент мәлімдеген шаралардың барлығы қысқа мерзімде тиісті нәтиже беріп, пневмонияның орташа және ауыр түрімен ауыратын науқастардың ауруханада емделуі мен оларды қажетті дәрі-дәрмекпен қамтамасыз ету мәселелерін шешетін болады. Бұл шаралар елдегі COVID-19-ға қатысты жағдайды тұрақтандыруға мүмкіндік береді деп үміттенеміз. Пандемияға қатысты проблемаларды жүйелі түрде шешу жалғасып жатқанда, біздер қол құсырып күтпеуіміз керек деп ойлаймын. Әрбір ұжым өз деңгейінде індетке байланысты қиын жағдайға тап болып, көмек қажет ететін қызметкерлеріне тиісті қолдау көрсету үшін барлығын жасауы керек.
Бұл тұрғыда, Қ.А.Ясауи атындағы Халықаралық қазақ-түрік университеті басшылығы, Кәсіподақ ұйымы және университеттің клиника-диагностикалық орталығы бірлесе Жол картасын жүзеге асыруда. Жол картасы аясында клиниканың және медицина факультетінің дәрігерлерінен топ құрылып, науқастанған қала тұрғындары мен университет қызметкерлеріне онлайн-кеңес беруде. Қызметкерлерге дәрі-дәрмек сатып алуға Кәсіподақ ұйымы қаржылай қолдау көрсетеді. Осы мақсатта, бекітілген хаттамаға (протокол) сәйкес антибиотиктермен пневмонияны емдеудің 200 курсына жеткілікті қаражат бөлінді.
Университет Клиникасында қызметкерлерге ақысыз негізде пневмонияны анықтау үшін компьютерлік томаграфиямен тексеру жүргізілуде және қажет болған жағдайда емделуі үшін клиниканың провизорлық бөліміне жатқызылуда. Сондай-ақ, университет Клиникасы мен «АИ» медициналық орталығында амбулаториялық емдеу ұйымдастырылған. Мұнда оқытушылар мен қызметкерлер тиісті процедуралардан өтуіне мүмкіндік жасалған. Осылайша, біз диагностика мен емге мұқтаж барлық қызметкерлерді қамтамасыз етудеміз.
Сонымен қатар, университеттің Кәсіподақ ұйымы тарапынан пневмониядан жазылып шыққан оқытушылар мен қызметкерлердің еліміздің ең жақсы шипажайлары мен демалыс үйлерінде реабилитациядан өтуі үшін 300 жолдама беру мәселесі шешімін тауып отыр.
Біз, жұмыла күресу арқылы ғана короновирустық пандемияны тоқтатып, оның жойқын күшпен қайталануына қарсы қалқан бола аламыз. Дүрбелең мен эмоцияға жол бермеуіміз керек. Әлеуметтік желілерде көптеген жалған ақпараттың жиі таратылатынын ескере отырып, баршаңызды тек ресми ақпараттарды қолдануға шақырамын.
Әзиз халқымыз бұдан да ауыр сынақтардан абыроймен өткен, сондықтан біз — қазіргі қазақстандық буын, бұл қиындықтарды да абыроймен жеңеміз деп сенемін!

Болатбек АБДРАСИЛОВ,
Қ.А.Ясауи атындағы Халықаралық
қазақ-түрік университетінің ректоры

Добавить комментарий

Ваш адрес email не будет опубликован. Обязательные поля помечены *