Түркістан облысы Манкент ауылдық округінде жылдан жылға мектепке баратын бала санының артуына байланысты жаңа мектеп және қосымша ғимарат салу мәселесі туындайды.
Осыған байланысты, ауданға қарасты ауылдық округтерінде жаңа білім ордаларын салу арқылы ескі, тозығы жеткен ғимараттардың орнына немесе бос жатқан жер теліміне жаңа типтік үлгідегі ғимараттар салу, сондай-ақ үш ауысымда білім алатын балалар үшін оңтайлы шешімі табылуда.
Бұл ретте, ағымдағы жылы Манкент ауылдық округінде жеке кәсіпкер, инвестор Н.Сулайманов өз есебінен 1200 орындық 4 жекменшік мектептің құрылысын бастады.
Мектептердің құрылыс жұмыстарының барысымен аудан әкімі Ұ.Сәдібеков, мәслихат хатшысы Ш.Халмурадов және тиісті бөлім басшылары танысты.
«АвтоРемСтройЛТД» ЖШС-інің басшысы Н.Сулайманов мектеп құрылыстары үшін «БанкЦентрКредит» АҚ-нан 5 млрд. теңгеге жуық несие алған. Тартылған жеке инвестиция әр мектептің құрылысы 1 млрд. 200 млн. теңгені құрайды
Осы несие қаржылары және мемлекеттен баланы оқытуға қаралған 26 мың теңге субсидия есебінен мектеп құрылыстарының жұмыстары қаңтар айында қарқынды басталып жүргізілуде.
Нысандардың құрылыстарын тамыз айына аяқтап, тапсыру жоспарлануда. Құрылыс нысандарының әрқайсысында 120 адам жұмыс істейді. Оларға жұмыс көлеміне қарай 200-500 мың аралығында айлық-жалақылары төленеді.
Жаңадан ашылатын әрбір мектепте шамамен 150 адам жұмыспен қамтылып, 1000-1500-ге жуық бала тегін оқытылмақ.
Мектеп оқушылары үшін қажетті жағдай жасау көзделуде. Білім берудің мемлекеттік стандарттына сәйкес, балалар оқытылатын болады. Пәндік және спорттық үйірмелер ашу, бастауыш сыныптарының балаларын ыстық тамақ пен мектеп формалары, сонымен қатар оқу-құралдарымен тегін қамтамасыз ету, үздік оқитын оқушылар үшін 25-50 мың теңге көлемінде шәкіртақы төлеу мәселелері көзделуде. Балаларды мектепке тасымалдау қызметі де ұйымдастырылуда.
Жеке кәсіпкердің айтуынша, өткен жылы Қарабұлақ ауылында үш тілде оқытатын 1200 орындық «Низамхан Сулайманов» атындағы жекеменшік мектеп ашқан. Сонымен қатар, биыл аудан аумағында қосымша 10 мектептің құрылыстары жоспарланып отыр. Барлығы да 1200 орындық жалпыға ортақ білім беретін мекемелер.
Атап айтқанда, Манкент ауылдық округінен 4 жекеменшік мектеп 2022 жылға тапсырылатын болса, Ақсукент ауылдық округінде 5 және Қарасу ауылдық округінде 1 жекеменшік мектеп құрылыстары алдағы уақытта басталып, 2023 жылға өтпелі нысандар ретінде тапсыру жоспарлануда.
Аралау соңында, аудан әкімі кәсіпкердің жұмысын қолдап, оң пікірін білдірді.