Түркістан қаласында ҚР Парламенті Сенатының қолдауымен және Қазақстан Шахмат Федерациясы (ҚШФ) ұйымдастыруымен «Senat Open» ІІ Кубогының алғашқы кезеңі өз мәресіне жетті. Бұл ірі шахмат турнирі Сенат Төрағасы Мәулен Әшімбаевтың бастамасымен жүзеге асып, Қазақ шахмат федерациясының президенті Тимур Турлов тарапынан қолдау тапты.
Турнирге мемлекеттік қызметшілер, ардагерлер, мәслихат депутаттары, қоғамдық кеңес мүшелері мен БАҚ өкілдері қатысты. Жарыс швейцариялық жүйе бойынша 9 турда, 10+5 минуттық уақыт бақылауымен өтті. Аталған кезеңде 120 адам тіркеліп, оның 105 қатысушысы өз бақтарын сынады.
Турнирдің ашылуында Қазақстан шахмат федерациясының вице-президенті Александр Бабенко және ҚР Парламенті Сенатының депутаты Мұрат Қадырбек сөз сөйлеп, шараның маңыздылығын атап өтті.
Жартылай финалға жолдама алатын 35 қатысушының есімдері бүгін белгілі болады. Жарыстың жартылай финал кезеңі 12 шілде күні Түркістан қаласында өтсе, финал 29 тамызда Астанада ұйымдастырылмақ.
Бұл кубок мемлекеттік құрылымдар мен жұртшылық арасында шахмат ойынын насихаттауға және аймақтар мен жергілікті өкілді органдар арасындағы байланысты нығайтуға бағытталған маңызды шара болып табылады.
Қатысушыларды қарсыластарымен тең дәрежеде шахмат үстелінде сынға түсіп, біліктіліктерін көрсету мүмкіндігіне ие болатыны сөзсіз.