1 мамыр – Қазақстан халқының бірлігі күні еліміздің барлық өңірінде ерекше атап өтілетін маңызды мерекелердің бірі. Биыл бұл айтулы күн Түркістан қаласында да жоғары деңгейде ұйымдастырылып, көпшіліктің көңілінен шықты.
Мерекеге орай қаладағы көрнекті орындардың бірі – Керуен сарай туристік кешенінде ауқымды іс-шара өтті. Шараға өңір тұрғындары мен қонақтар жиналып, бірлік пен татулықтың маңызын айшықтайтын мерекелік бағдарламаны тамашалады.
Салтанатты жиынға Түркістан облысының әкімі Нұралхан Көшеров қатысып, барша жұртшылықты мерекемен құттықтады. Өз сөзінде өңір басшысы бұл күннің ел өміріндегі орны ерекше екенін атап өтті.
— Бұл мереке – еліміздегі татулық пен тұрақтылықтың жарқын көрінісі. Бірлік – біздің басты байлығымыз, болашағымыздың кепілі. Мемлекет басшысы Қасым-Жомарт Тоқаев атап өткендей, әр азаматтың бір-біріне деген тілеулестігі арқылы бүкіл ұлттың тұтастығын таныта білдік. Қазақстан халқы тарихтың күрделі кезеңдерінде бірлік танытып, әрдайым табысқа жетіп келеді, – деді облыс әкімі.
Сондай-ақ, ол қазақ халқының кеңпейілдігін ерекше атап өтіп, қилы кезеңдерде түрлі этнос өкілдеріне пана болғанын тілге тиек етті. Соның нәтижесінде бүгінде елімізде татулығы жарасқан көпұлтты қоғам қалыптасқанын жеткізді.
Айта кетейік, Түркістан облысында бүгінде 2 миллионнан астам халық тұрады. Өңірде 50-ден астам этнос өкілдері бір шаңырақ астында тату-тәтті өмір сүріп келеді. Сонымен қатар, Қазақстан халқы Ассамблеясы аясында түрлі этномәдени бірлестіктер белсенді жұмыс атқарып, қоғамдық келісімді нығайтуға үлес қосуда.
Облыс әкімі өз сөзінде алдағы маңызды халықаралық шараларға да тоқталды. Атап айтқанда, Түркістан қаласында түркі мемлекеттері басшыларының қатысуымен өтетін жоғары деңгейдегі жиын өңірдің дамуына тың серпін беретінін жеткізді. Мұндай маңызды басқосулар қаланың халықаралық деңгейдегі беделін арттырып, туристік және экономикалық әлеуетін күшейтетіні сөзсіз.
Мерекелік шара барысында өңірдің әлеуметтік-экономикалық дамуына елеулі үлес қосқан, ұзақ жылдар бойы адал еңбек еткен этномәдени бірлестік өкілдері арнайы марапаттарға ие болды. Бұл – ел бірлігін нығайту жолында еңбек етіп жүрген азаматтарға көрсетілген құрметтің белгісі.
Іс-шара соңы концерттік бағдарламаға ұласып, түрлі ұлт өкілдері өз өнерлерін ортаға салды. Ән мен би, ұлттық дәстүрлер көрінісі көрермендерге көтеріңкі көңіл-күй сыйлап, мерекенің мәнін аша түсті.
Қорытындылай келе, Түркістанда өткен бұл мерекелік іс-шара – ел ішіндегі бірлік пен татулықтың нақты көрінісі. Мұндай игі шаралар халықты жақындастырып, ортақ құндылықтарды дәріптеуге жол ашады. Бірлігі бекем елдің болашағы да жарқын болары анық.
Айдос Әлқуат,
Түркістан облыстық мәдениет және халық шығармашылығы орталығының маманы.