«Әділет» партиясының Түркістан облыстық сайлауалды штабының өкілдері Төле би ауданында медицина саласының қызметкерлерімен кездесіп, денсаулық сақтау жүйесін жетілдіру мәселелерін талқылады. Жиынға облыстық мәслихат депутаттығына кандидат Ғалымжан Елшібай қатысып, партияның 2026–2031 жылдарға арналған сайлауалды бағдарламасының негізгі бағыттарын таныстырды.
Кездесудің басты мақсаты – денсаулық сақтау саласындағы өзекті мәселелерді талқылау, медицина қызметкерлерінің ұсыныс-пікірлерін тыңдау және тұрғындарға көрсетілетін медициналық көмектің сапасы мен қолжетімділігін арттыруға бағытталған бастамаларды түсіндіру. Әсіресе ауылдық елді мекендердегі медициналық қызмет көрсету деңгейін көтеру, емдеу мекемелерінің жұмысын жетілдіру және саланың инфрақұрылымын жаңарту мәселелеріне ерекше назар аударылды.
Кездесу барысында медициналық ұйымдардың материалдық-техникалық базасын нығайту, заманауи құрал-жабдықтармен қамтамасыз ету, алғашқы медициналық-санитарлық көмектің сапасын жақсарту және халыққа қажетті медициналық қызметтерді қолжетімді ету бағыттары сөз болды. Сонымен қатар ауылдық жерлердегі денсаулық сақтау нысандарын жаңғырту, медициналық қызмет көрсетуде заманауи технологияларды енгізу және білікті мамандардың әлеуетін арттыру қажеттігі айтылды.
Ғалымжан Елшібай партияның сайлауалды бағдарламасында әлеуметтік саланы дамыту, соның ішінде денсаулық сақтау жүйесін жетілдіру маңызды басымдықтардың бірі ретінде белгіленгенін атап өтті.

«Халықтың сапалы медициналық көмекке қол жеткізуі – қоғамның әл-ауқаты мен өмір сүру сапасын айқындайтын маңызды көрсеткіштердің бірі. Сондықтан партия бағдарламасында денсаулық сақтау инфрақұрылымын дамытуға, медициналық мекемелерді жаңғыртуға және ауылдық жерлердегі медициналық қызметтің қолжетімділігін арттыруға басымдық беріліп отыр. Сонымен бірге саладағы кадр тапшылығы мәселесін шешу, медицина қызметкерлерінің кәсіби біліктілігін жетілдіру және олардың еңбек жағдайын жақсарту бағытындағы бастамалар да назардан тыс қалмайды», – деді Ғалымжан Елшібай.

Бұдан бөлек, басқосу барысында медицина қызметкерлерінің қоғамдағы орны мен жауапкершілігі, олардың күнделікті еңбегін бағалау, кәсіби дамуына жағдай жасау мәселелері де қозғалды. Қатысушылардың пікірінше, денсаулық сақтау жүйесінің тиімді жұмыс істеуі тек медициналық мекемелердің материалдық жағдайына ғана емес, сонымен қатар білікті мамандардың жеткілікті болуына және олардың еңбек етуіне қолайлы жағдай жасалуына тікелей байланысты.
Кездесу ашық пікір алмасу форматында жалғасын тапты. Медицина саласының өкілдері өздерін толғандырған мәселелерді ортаға салып, денсаулық сақтау ұйымдарының жұмысын жақсартуға қатысты ұсыныстарын жеткізді. Сондай-ақ ауылдық жерлердегі медициналық қызмет сапасын арттыру, мамандарды қолдау және саланың инфрақұрылымын дамыту жөніндегі ойларымен бөлісті.
Өз кезегінде партия өкілдері айтылған ұсыныстардың маңыздылығына тоқталып, сайлауалды бағдарламада көзделген міндеттерді түсіндірді. Жиын соңында медицина қызметкерлері ұсынылған бастамалармен танысып, партия бағдарламасының негізгі бағыттарын қолдайтындықтарын білдірді.
