Бүгінгі күні объектіні электр энергиясымен тұрақты түрде жабдықтау – қалыпты тұрмыс жағдайларын қалыптастыруға және офистер мен өндіріс орындарының тиянақты жұмысын қамтамасыз етуге қажетті фактор. Сонымен қатар, электр энергиясымен жабдықтаудағы іркілістер келеңсіз жағдайларды тудыруы мүмкін бірнеше ғимараттар, атап айтқанда медициналық мекемелер, білім беру ұйымдары мен басқа да ұйымдар бар. Электрмен жабдықтау жүйесін жақсы жағдайда сақтау үшін дұрыс пайдалануды және жүйелі түрде сервистік қызмет көрсетуді қамтамасыз ету керек.
Қаратау ауданы аумағында орналасқан Достық тұрғын алабын сапалы электр қуатымен қамту жұмысы «Жолсерік» ЖШС тарапынан биылғы жылдың маусым айында басталған.
Осы жұмыстардың сапалы жүргізілуін бақылау мақсатында қала әкімі М.Әйтеновтің тұрғындарға жайлы және қолайлы өмір сүру ортасын қалыптастыру туралы берген тапсырмасы негізінде Энергетика және инфрақұрылымды дамыту басқармасының басшысы Боранбай Булатбеков құрылыс жұмыстарының барысын пысықтады.
Қазіргі уақытта мұнда 224 электр бағанасы орнатылып, 14 шақырым электр желісі тартылды. Құрылыс жұмыстарының 70 % аяқталды. Жыл соңына дейін құрылыс жұмыстары толығымен аяқталады.
Содан кейін, «ОңтүстікЖарықТранзит» ЖШС-мен әр үйге жеке есеп шот ашып, электр қуатына қосу жұмыстары жүргізілетін болады. Нәтижесінде Достық тұрғын алабындағы 234 отбасы сапалы электр қуатымен қамтамасыз етіледі.