Тұңғыш Президентіміздің қолтаңбасы бар Тәуелсіздік дәуірінің ерекше жобасы ретінде Елордамыз – Нұр-Сұлтан қаласын айрықша атап өтуге болады. Қысқа мерзім ішінде Қазақстанның бас қаласы еліміздің ғана емес, бүкіл өңірдің нақты саяси, экономикалық және мәдени орталығына айналды.
Бұдан бөлек, Шымкенттің республикалық дәрежедегі қалаға айналуын – Тұңғыш Президентіміз Нұрсұлтан Әбішұлы Назарбаевтың жобасы екенін мақтанышпен айтамыз. Елбасының бұл тарихи Жарлығы қаланың жаңа тынысын ашты, серпін берер мүмкіндіктерге бастады.
Соңғы жылдары еліміздің үшінші мегаполисінде өнеркәсіп өнімі 2 есеге артып, 700 млрд. теңгеге жетті. Инвестиция 1,3 трлн. теңгеге өсті. Биылғы жылы алғаш рет 1 млн. шаршы метр тұрғын үй салынуда. Қала бюджеті төрт есеге өсіп, 495 млрд. теңгеге жетті.
Қазақстан Республикасының Тұңғыш Президенті – Елбасы қамқорлығындағы қаламыз бүгіннен де биік белестерден көрінеді деген сенімдеміз.
Мұрат Әйтенов өз сөзінде еліміз Еуразиялық кеңістіктегі ірі транзиттік хабқа айналып, 2 700 шақырымнан асатын Батыс Еуропа-Батыс Қытай көлік дәлізінің қазақстандық учаскесі ашылғанын айтты. Сонымен бірге темір жол және автомобиль магистральдары желісі кіретін Транс-каспий дәлізі құрылғанын. Осы жылдарда 15 мың шақырымға жуық автомобиль жолдары, 4 мың шақырымды құрайтын темір жолдар салынып, елдегі 16 әуежай қайта жаңартылғанын және 4 әуежай жаңадан салынғанын мәлім етті.