Түркістан облыстық өңірлік коммуникациялар қызметі хабарлағандай, өңірдегі 831 елді мекеннің 86 пайызға жуығы ауыз сумен қамтылды.
Бұл туралы арнайы өткен брифингте облыстық энергетика және тұрғын үй-коммуналдық шаруашылық басқармасының басшысы С.Далиев айтты.
«Түркістан облысында 831 елді мекеннің 712-сі (7 қала, 705 ауылдық елді мекен) яғни 85,7 пайызы ауыз сумен қамтамасыз етілді. Сондай-ақ, биыл ауыз сумен жабдықтау бойынша 53 нысанның құрылысы жүргізілуде. Оның 26-сын осы жылы аяқтап, пайдалануға беру жоспарланған. Ал, қалған 27 нысанның құрылысы келесі жылға өтпелі» деді басқарма басшысы Сәкен Шалабайұлы.
Спикердің сөзінше, жыл аяғына дейін 13 елді мекенді (Сарыағаш-4, Келес-4, Қазығұрт-2, Ордабасы-3) ауыз сумен қамтамасыз ету, ал, 14 елді мекеннің (Сауран-1, Қазығұрт-1, Төлеби-5, Жетісай-2, Мақтарал-1, Ордабасы-1, Шардара-1, Түлкібас-2) тозығы жеткен су құбырларын жаңарту жоспарланған.
Сонымен қатар, орталықтандырылған ауыз сумен қамтамасыз етілмеген 119 елді мекеннің 71-іне су құбырларын жүргізу, 48-іне блок-модуль кешенін (КБМ) орнату қажет.
Айта кетейік, өңірдегі елді мекендерді 100 пайыз ауыз сумен қамтамасыз ету мақсатында облыс әкімдігі «Түркістан облысы бойынша ауыз сумен қамтамасыз етудің 2022-2025 жылдарға арналған іс-шара жоспарын» бекітті.