Сыбайлас жемқорлыққа қарсы іс-қимыл агенттігі кәсіпкерлер құқығын қорғауға бағытталған «Бизнеске жол» жобасын іске қосты. Толық ақпаратты антикордың call-орталығына 1424 нөмірі бойынша хабарласып ақпарат алуға болады.
Жобаның мақсаты – кәсіпкерлерге құжаттарды рәсімдеу кезінде әкімшілік кедергілерді, әуре-сарсаңды еңсеруге көмектесу, мемлекеттік қызметшілер қабылдайтын шешімдердің мерзімі мен ашықтығын сақтауды қамтамасыз ету.
«Кәсіпкерлер жерді ресімдеу, сәулет және басқа да бақылаушы органдардан рұқсат алу, коммуникацияларды қосу, сондай-ақ түрлі мемлекеттік қолдау шараларын (кредиттер, гранттар, субсидиялар) алу кезінде кездесетін нақты проблемаларды шешумен айналысатын боламыз», — делінген Сыбайлас жемқорлыққа қарсы іс-қимыл агенттігі хабарламасында.
Бұл туралы аумақтық департаменттердің басшылары Facebook парақшаларында хабарламалар қабылдауда. Мәлім етілгендей, қазір өңірлерде бизнестен өтініш қабылдау үшін арнайы алаңдар мен байланыс арналары жұмыс жасап жатыр.