Министрліктің хабарлауынша, осы саладағы негізгі басымдықтың бірі – білім деңгейі мен экономикалық әлеуетті арттырып, Қазақстанның әрбір тұрғынын 100 Мбит/с-дан астам сапалы және қолжетімді интернетпен қамту. Сондықтан бұл тұрғыда «Қолжетімді интернет» – іргелі ұлттық жоба. Шағын және орта байланыс операторларын қолдау стратегиясы жоғары жылдамдықты интернетті 400 мың үй шаруашылығына жеткізуге және азаматтар үшін цифрлық технологияларға қолжетімділікті айтарлықтай жақсартуға мүмкіндік береді. Интернет игілігін арттыру – заман талабына айналуда. Осы орайда интернет игілігін арттырудың тиімділігі жөнінде сала мамандарының айтқан пікірін арқау етіп, өңір тұрғындарының назарына танымдық мақаламызды ұсынып отырмыз.
Мысалы, шалғайдағы және халқы аз ауылдарда электр бағаналары бойынша желілер тартылып, жағдай жасалынбақ. Бұл оларды интернетке қосуды жеделдетуге және шалғайдағы ауылдарға интернет-провайдерлерді кеңейту және жақсартуға, шағын және орта байланыс операторларын субсидиялауға мүмкіндік береді.
– Біз осы жобаны іске асыру арқылы біршама нәтижеге қол жеткізуді жоспарлап отырмыз. Министрлік салалық мемлекеттік орган ретінде Қазақстанның барлық халқын жоғары жылдамдықты интернетпен қамту мақсатын көздейді. Яғни басты мақсат – 2027 жылға қарай, ауылдарда дамыған телекоммуникациялық инфрақұрылымға қол жеткізу, бұл қала мен ауыл арасындағы цифрлық теңсіздікті азайтуға көмектеседі. 2027 жылы жоба аяқталғаннан кейін кемінде 2,3 млн ауыл тұрғыны жылдамдығы 100 Мбит/с құрайтын Интернет желісіне қол жеткізу арқылы жоғары жылдамдықты байланыс инфрақұрылымына қосылады, – деп түсіндірді Телекоммуникация комитетінің төрағасы Ержан Мейрамов.
Бүгінде елімізде 90-ға жуық орта және шағын оператор жұмыс істейді. Олардың ішінен шағын және орта операторлар қауымдастығы құрылды. Осы шағын және орта байланыс операторлары саланың телекоммуникациясын және нарықта саламатты бәсекелестікті дамытудың тірегіне айналып отыр. Министрлік осы операторлардың дамуына кедергі келтіретін мәселелерді анықтап, шешуі қажет. Ғарыш саласы, операторлар мен байланыс инфрақұрылымын дамыта алсақ, цифрлық теңсіздіктен құтылудың ауылы алыс емес.