Әйел. Көктем. Гүл . Осы үш сұлулық бірін – бірі үнемі толықтырып тұрады. Көктем мезгілі мерекелер мезгілі десекте болады . Себебі, бұл мезгілде айтулы мерекелер өте көп . Солардың бірі, әрі ерекшесі — 8 наурыз. Яғни, нәзік жандылардың құшақтары гүлге толып, көздері бал-бұл жанатын шақ та жақын. Биылғы дайындығыңыз қалай, ер азамат? Анаңызға, әпке-жеңгеңізге, сүйкімді қарындастар мен сүйікті жарға не сыйламақсыз? Қандай тарту ұсынсаңыз да, қасында бір шоқ гүлі болсын. Ал «Қандай гүл?» деген сұраққа жауапты төменнен табасыз.
Әжеңізбен анаңызға сүйікті гүлін сыйлаған дұрыс. Тез солатын гүлдерді сыйлаудан аулақ болыңыз. Ол, арнайы құтыда орналастырылған болуы тиіс. Себебі, тез қурамайды, ерекше күтімді қажет етеді. Ал, күнделікті күйбең тіршілік пен үй шаруасын қатар ала жүретін аналарымыз бір мезгіл гүлге көңіл бөлуге де уақыт табады. Жылдан-жылға жайнап өсіп келе жатқан гүл өз иесіне қуаныш сыйлайды. Сонымен қатар, қызғылт, көгілдір немесе сарғылт түсті таңдаңыз. Гүлдер әлемінде қызғылт түс – махаббатты, туыстықты, көгілдір түс – отбасылық байланысты, сарғыш түс – қуанышты білдіреді. Гүлді таңдау барысында сатушыдан кеңес алыңыз.
Жас қыздарға әлі қауызы жарылмаған нәзік гүлді ұсыныңыз. Оның жасына байланысты гүлдің көлемі үлкейе бермек. Ал сүйіктіңізге алқызыл қызғалдақ орамасын сыйға тартыңыз. Сүйіктіңіздің өзі ұнататын гүлін тарту еткен жақсы. Оны таба алмасаңыз – қызыл раушан сыйлаңыз. Раушан арадағы сүйіспеншіліктің белгісі. Егер сіздер кездесіп жүрген болсаңыздар қызыл және шай раушандары таптырмас талғам.
Ұжымдағы әріптес қыз – келіншектерге көк және күлгін түсті, ұзын сабақты, орам ішіне тығыз орналасқан гүлді тарту етіңіз. Флористикада көк түс — сенімділік пен тығыздықты, күлгін түс — құрметті білдіреді. Сыйлаған гүліңіз безендірусіз-ақ өзін-өзі толықтырып тұрғаны абзал. Сары гүлдер ажырамас достықтың белгісі. Сонымен қатар, ол керемет көктемгі көңіл күй мен естен кетпес ерекше сезім сыйлайды.
Гүл таңдауға келгенде әр әйелдің өз талғамы бар. Егер жақсы танитын жақын жандарыңыздың сүйікті гүлін білсеңіз сол гүлді тарту етіңіз. Бір шоқ гүл, ыстық сезімді, ажырамас достықты, сенімді білдіреді. Гүлдер әлемінің ережелерін сақтай отырып, жарыңыз бен жақындарыңызға үнемі керемет көңіл – күй сыйлап тұрсаңыз өзіңіз де көңілді жүресіз.
Ақбота ЕРГЕШБАЙ