Мақтааралда Облыстық мәдениет және халық шығармашылығы орталығының ұйымдастыруымен мәдениет үйінде «Отбасы – өнер ордасы» атты семинар-тренинг болып өтті. Шараның басты мақсаты өнерлі отбасылардың шығармашылығын қолдау, оларды насихаттау, ұлттық рухани құндылықтарды сақтап қалу және дәріптеу. Аталған шараға облыс көлеміндегі отбасы үйірмелерінің жетекшілері қатысып өзара тәжірибе алмасты. Тренинг барысында «Ағаш бұйымдарын көркемдеп өңдеу» жұмысы көрсетілді. Ағаш шебері Мақтаарал аудандық мәдениет үйінің қызметкері, баяндамашы Ибрагимов Әлімбек , «Өнерді серік еткен жанұя» Ақмырзаевтар отбасы вокалды аспапты ансамблінің жетекшісі, баяндамашы Ізбаева Қымбат, «Фольклор – ұлтымыздың музыкалық мұрасы» Мақтаарал ауданы Әзербайжан ұлтының отбасылық ансамбль жетекшісі Валиев Ахмед, «Өнер шамшырағы» тақырыбында Мақтаарал ауданы отбасылық «Тамаша» фольклорлық ансамбль жетекшісі Жәнібек Тағаевтар шығармашылығын ұсынып, шеберлік сағатын көрсетті.
Семинар-кеңестің ашылу салтанатында Мақтаарал ауданы мәдениет, тілдерді дамыту, дене шынықтыру және спорт бөлім басшысы Тәтеев Жандарбек Тоқтарұлы құттықтау сөз сөйлеп қатысушыларға сәттілік тіледі. Іс-шара барысында ауданнан келген қатысушыларды Мақтаарал аудандық орталықтандырылған кітапханасымен қоса Түркістан облысының мақта шаруашылығы тарихы музейімен таныстырды. Облыстық мәдениет және халық шығармашылығы орталығының бөлім басшысы Мұрат Жұманов: «Қазақ халқы – салт-дәстүрге өте бай. Ұлттық өнер, салт-дәстүр, әдет-ғұрып халық үшін, ұрпақ тәрбиесі үшін маңызы зор. Тәрбиесі тал бесіктен басталатын, ұрпаққа берер тәлімі телегей теңіз, сыйластығы сарқылмаған өнерлі отбасыдан шыққан салиқалы перзенттер елге адал қызмет етеріне сеніміміз мол. Туған жерін, елін қастерлейтін, озық ойлы, кең өрісті, өнерлі өнегелі ұрпақ тәрбиелеу жолында біз — мәдениет қызметкерлерінің ықпалы орасан зор»- деп семинарды қорытындылады.