Сауран ауданының әкімдігі Бұқаралық ақпарат құралдары мерекесіне орай, елуге жуық журналисті ауданның бетке ұстар кәсіпорындарымен таныстырды.
Мемлекет басшысы Қазақстан халқына Жолдауында: «Қазақстанның экономикалық дамуының жаңа парадигмасы еліміздің бәсекелік артықшылықтарын тиімді пайдалануға және өндіріс саласындағы еңбек, капитал, ресурстар, технология сияқты негізгі факторлардың әлеуетін барынша ашуға негізделеді», -деген болса, осы тапсырманы саурандықтар үлкен белсенділікпен жүзеге асыруда.
ҚАЛАМГЕРЛЕРГЕ ҚАМҚОРЛЫҚ ҚАЖЕТ
Журналистерді өңір басшысы Дархан Сатыбалды ерекше құттықтады.
«Сіздерді кәсіби мерекелеріңізбен шын жүректен құттықтаймын! Алаштың ардақтысы Міржақып Дулатұлы «Қай жұрттың баспасөзі мықты болса, сол елдің өзі де күшті» деген екен. Бұл тұжырым қазір де барынша өзекті.
Журналист болу – халыққа қызмет ету. Ақпарат саласы – қоғамдық пікір қалыптастыратын маңызда сала. Сондықтан, журналистика саласына артылар міндет пен жүктің жеңіл емес екендігі белгілі. Сіздер күнделікті еңбектеріңізбен елімізде және өңірімізде болып жатқан оқиғалар туралы халықты және билік органдарын ақпараттандырып, қоғамдық пікір мен адамгершілік құндылықтарын қалыптастыруға зор үлес қосып келесіздер.
Бүгінде Түркістан облысының медиа кеңістігінде 180-нен аса бұқаралық ақпарат құралы жұмыс істеуде. Әрбір басылымның өз оқырманы, телеарна мен радионың өз көрермені мен тыңдарманы бар. Бұл орайда, өңірімізде абырой биігінен көрініп жүрген кәсіби журналистеріміз аз емес. Олар еселі еңбегімен оқырманның, көрерменнің алғысына бөленуде. Бұл – адал әрі қажырлы еңбектеріңізге берілген баға деп ойлаймын.
Сіздер, Түркістан облысының дамуын ғана емес, еліміздің руханиятын, қоғамдық-саяси өмірін халыққа жеткізіп жүрген, мемлекетіміздің гүлденуі жолында аянбай еңбек етіп жүрген кәсіби мамансыздар. Сіздердің Түркі жұртының рухани астанасы – Түркістанның қалыптасуына, Түркістанның көркеюіне қосып жатқан сүбелі үлестеріңіз үшін алғыс айтамын.
Ел болып еңселенуге, өңіріміздің жетістіктерін насихаттауға және қоғамдық-саяси ахуалын бекемдеуге, Мемлекет басшысының реформалары мен тапсырмаларын жүзеге асыруға қосқан өлшеусіз үлестеріңіз үшін тағы да алғысымды білдіремін. Алдағы уақытта да ел игілігі жолында қалам құнарымен, ой шұрайымен қоғамға талмай қызмет ете беріңіздер!
Сіздерді төл мерекемен шын жүректен құттықтай отырып, еңбектеріңізге толағай табыс, шығармашылық шабыт, отбасыларыңызға бақ-береке тілеймін! — деді Дархан Сатыбалды.
Бір қызығы, кей шенеуніктер секілді қызметтік көлігімен өндірісті аралап, тілшілерге мұрнын шүйіре қарайтын әкім қаралар секілді емес, Мақсат Асылбекұлы журналистермен бірге бір автобуста отырып, емен жарқын сырласты. Бұл шын мәнінде қаламгерлер мен түймедейді түйедей етіп көрсететін блогерлердің де ризашылығына бөленді.
Әкіммен әңгіме барысында «Түркістан Медиа» холдингінің бас директоры Тельман Бейсенов Астанада қаламгерлерге жетпістен астам пәтер берілгендігін тілге тиек етіп, Шерхан Мұртаза айтпақшы «арқалағаны алтын, жегені жантақ» журналистерге билік тарапынан жағдайларын түсінушілікпен қарап, қамқорлық жасауы кемшін түсіп жатқандығын жасырмады. 2018 жылы «Айқын» газетінен киелі шаһарға келіп, арада жеті жыл өтсе де әлі күнге жалдамалы пәтерде тұрып жатқан Жадыра есімді журналист қыз Саурандағы 250 мың теңге жалақы беретін, үш мезгіл ас-ауқаты тегін, жатын орны бар «TAK Mebel» кәсіпорнына тігінші болып қалуға келісімін берді.
ИНВЕСТОРЛАРҒА ҚОЛАЙЛЫ ЖАҒДАЙ ЖАСАЛУДА
Сауран ауданының әкімі Мақсат Таңғатаров аудан аумағындағы ауылдарда да он гектарден арнайы жер бөлініп, кәсіпкерлердің еркін жұмыс жасауы үшін қолайлы жағдайлар жасалып жатқандығын мәлімдеді. Оның айтуынша, Сауран ауданы аумағында жұмыс жасауға, кәсібін ашуға ниетті азаматтарға жер беріліп, оның суы, жарығы, асфальты секілді инфрақұрылымы толығымен жабдықталатындығына тоқталды.
-Қазір, жасыратыны жоқ, үлкен мегаполистерде үйсіз-күйсіз ауылдағы қарт ата-анасына алаңдап жүрген ұл-қыздарымыз көп. Соларды ауылға қайтарудың барлық мүмкіндіктерін жасаудамыз. «Ауыл- ел бесігі», «Ауыл аманаты» атты үлкен жобаларымыз бар. Мемлекет басшысы ең алғашқы Заңын да ауылды дамыту туралы мәселеден бастағаны тегін емес, — дейді Мақсат Асылбекұлы.
Сауран «аудан» мәртебесіне ие болғаннан бастап инвестициялық әлеуеті көтеріліп, жаңа мүмкіндіктерге жол ашылды. Жеке инвесторлардың аудан аумағында инвестициялық жобаларды жүзеге асыруға қызығушылығы артқан. Өткен жылы ауданға 34,6 млрд. теңге инвестиция тартылған болса, биыл инвестиция көлемін 42 млрд. теңгеге дейін жеткізу жоспарлануда.
Аудан әкімінің мәлімдеуінше, Сауран ауданы бойынша 2024-2025 жылдар аралығында жалпы құны 61,4 млрд. теңгені құрайтын 102 инвестициялық жобаны іске асыру көзделіп отыр. Атап айтқанда, өңдеу өнеркәсібі саласында 23 жоба жүзеге аспақ. Оның ішінде, жиһаз жасау бағытында 12 цехті іске қосу жоспарланса, бүгінгі таңда 9 цех өз жұмысын бастап кетті. Жыл соңына дейін тағы 3 жиһаз жасау орны пайдалануға берілмек. Бұдан бөлек, құрғақ құрылыс қоспаларын өндіретін, трансформатор құрастыру және жөндейтін, қатты тұрмыстық қалдықтарды өңдеу бағытында, жаңбырлату қондырғыларын өндіретін, тері, мақта және мақта шитін өңдейтін, жылыжай жабдықтарын өндіретін, тігін цехтары мен өнеркәсіптік тоңазытқыш жабдықтарын өндіретін кәсіпорын алдағы уақытта іске қосылады.
Демалыс аймағы және қоғамдық қызмет көрсету бойынша 22 нысан салу жоспарланып, 2 нысан іске қосылды. Қалған 20 нысан 2025 жылы аяқталады. Әлеуметтік салада кәсіпкерлер есебінен 15 нысанның құрылыс жұмыстары жүргізілуде. Ауыл шаруашылығы саласында 41 жоба бар. Сy ресурстарын үнемді пайдалану мақсатында 1051 гектарға жаңбырлатып және тамшылатып суару құрал-жабдығын орнату бойынша 5 жоба жоспарланып, орнатылды. Тамақ өнімдері бойынша 3 жобаны жүзеге асыру көзделсе, сүт тауарлы фермасы бойынша 3 жоба іске асырылмақ.
Ауданда мал шаруашылығын дамытуға ден қойылған. Бұл бағытта мал бордақылау және мал сою алаңдары мен құс фермасын салу, балық шаруашылығы мен мал азығын дайындайтын комбикорм цехын ашу жоспарда бар. Сонымен қатар, 4 гектар жерге өнеркәсіптік жылыжай және 1,7 гектарға фермерлік жылыжай салу көзделіп отыр.
Қазіргі таңда осы аталған жобалар бойынша барлығы 39 жоба іске қосылып, 650 жаңа жұмыс орындары ашылды.
ЖАҢБЫРЛАТЫП СУАРУ МАШИНАЛАРЫ МЕН ТРАКТОРЛАР ШЫҒАРЫЛАДЫ
Сауран ауданы, Шаға ауылдық округіндегі өндірістік аймағында орын тепкен «BNK GROUP LTD» жауапкершілігі шектеулі серіктестігі мекемесі жұмыс жасап келеді. Басшысы Ниязәлі Бейсенбаев. Бүгінгі таңда өндіріс орнында 80 адам тұрақты жұмыспен қамтылып отыр. Онда жаңбырлатып суару машиналары жасалып, тракторлар құрастырылуда. Жобаның қуаттылығы – жылына 950 жаңбырлатып суару жүйесін шығарады. Бұл техника америкалық технология негізінде жүзеге асырылып жатыр. Сондай-ақ, мұнда тракторда шығарылуда. «BNK GROUP LTD» ЖШС шығарылған өнімдерге өзге өңірлер және шетелдерден де сұраныс жоғары болып отыр.
Сонымен бірге, «Ақниет Холдинг» Мүгедектор қоғамы әскери шатыр өндіреді. Бұдан бөлек, корпустық, жұмсақ және медициналық жиһаз өндірісін шығарады. Қазіргі таңда 100 адамды тұрақты жұмыспен қамтып отыр.
ЖЫЛ ОН ЕКІ АЙ ЖЫЛЫЖАЙДА ЖҰМЫСТА
Сауран ауданы, Қарашық ауылдық округінде жеке кәсіпкер «Дильназ» шаруашылығындағы жылыжайда гүл өсірумен айналысып келеді. Басшысы Дильназ Омарова. Кәсіпкер жылыжайда жыл 12 ай түрлі үй және көше өсімдіктерін өсірумен айналысады. Мұнда роза, хризонтема, лотус, пиотония, сонымен қатар, шырша, жеміс ағаштарын өсіреді. Сирек өсіретін гүлдерді Қытай, Голландия елдерінен тапсырыспен алдырады.
Жайқалған гүлдерге сұраныс көп. Алыс-жақын қалаларға жеткізу қызметі бар. Кәсіпкер гүлді суаруда заманауи технологияларды қолданып келеді. Дильназ ханымның қоластында қырықтан астам ауыл адамдары жұмыс жасайды. Сонымен қатар, бөлме гүлдерін отырғызатын керамикалық ыдыстар мен түрлі мүсіндер өндіруді де қолға алған. Қазіргі таңда бір гектардан астам жерді игеріп, бес жүзден астам гүл түрлерін Қазақстаннан тыс мемлекеттерге де шығарып жатыр екен.
ЖЫЛЫНА 6 МЛН ДАНА КІРПІШ ҚҰЯДЫ
Сауран ауданы, Шорнақ ауылдық округінде «БИНЭКС» ЖШС зауыты кірпіш шығарады. Басшысы жеке кәсіпкер Мақсат Оспанов. 2019 жылы іске қосылған зауыт жылына 6 млн. дана кірпіш шығаруға қауқарлы. Жер көлемі 5,5 гектар жерді құрайды. Бүгінде зауытта 40 адам тұрақты жұмыспен қамтылған. Жұмысшылардың орташа айлық ақысы 210 000 теңге көлемінде.
Кәсіпкерлік саласы, оның ішінде шағын және орта бизнесті дамыту — бүгінгі күннің басты талабы. Осы мақсатта мемлекет тарапынан қолдау да көп. Ол үшін түрлі бағдарламалар қабылданып, қоғам үшін еңбектенемін дегенге мол мүмкіндік берілуде. Осындай мемлекеттік және өңірлік бағдарламаларға қатысып, шағын бизнесін шарықтатып отырған аудан кәсіпкерлерінің саны күн санап көбеюде. Бұл қуанарлық жайт. Себебі жұмыссыздар саны азайып, жаңа жұмыс орындары көптеп ашылуда.
ЖЫЛЫНА 12 000 ДАНА ЖИҺАЗ ӨНІМДЕРІН ШЫҒАРАДЫ
Сауран ауданы, Шорнақ ауылдық округінде «TAK Mebel» жиһаз кәсіпорны жұмыс жасайды. Бұл кәсіпорын екі рет республикалық «Алтын сапа» сыйлығын иемденген. Ауданда халық сұранысына қарай зауыттар мен фабрикалар ашу, жаңа жұмыс орындарын көбейтуге ден қойылған. Бұл бағытта ауданда бірқатар жобалар қолға алынып келеді. Әсіресе жиһаз шығару саласының даму қарқыны жоғары деуге болады. Жылына 12 000 дана өнім өндірілетін цехта 45 адам тұрақты жұмыспен қамтылған. Сапалы әрі бәсекелестікке төтеп беретін жиһаздарға сұраныс жоғары. Мұндағы өнімдер шетелдің жиһаздарынан кем емес.
Директордың орынбасары Ифтихар Жумадиллаевтың айтуынша, мұндағы өнімнің жоғары сапалы және қазіргі заманғы материалдарды пайдалану арқылы өндіруде. Қазіргі таңда алпыс түрлі орындықтар жасайды. 120 адам жұмыспен қамтылған. Сондай-ақ, жиһаз өнімдері сапа менеджменті сертификатпен расталған. Бұдан бөлек, өндіріс орны дизайнерлердің қатысуымен сенімді компоненттерді пайдалана отырып, тұтынушыға тек жоғары сапалы жиһаз ұсынуда. Аталмыш кәсіпорынның қызметкерлері шын мәнінде бірегей дизайнерлік жиһаздың керемет коллекцияларын жасап шығаруда.
-Қазіргі таңда «TAK Mebel» жиһаз кәсіпорнының өнімдерін еліміздің бірқатар аймақтарында жиһаз дүкендерінен сатып алуға болады. Алыс-жақын шетелдерден сұраныс жоғары. Шетелдік өніммен тең сапада шығаратын отандық өнімді қолдану арқылы жеке кәсіпкерлердің істерін дамытуға үлес қосуымыз керек. Ол арқылы жергілікті бюджетке мол қаражат түссе, тұрғындардың әлеуметтік-тұрмыстық жағдайын жақсартуда басқаға алақан жаймайтын болады, — дейді аудан әкімі Мақсат Таңғатаров.
Ескендір ЕРТАЙ.