Цифрлық даму, инновациялар және аэроғарыш өнеркәсібі министрлігі барлық өңірді сапалы интернетпен қамтуға баса мән беріп отыр. «Цифрлық теңсіздікті» жою – маңызды. Сол себепті де халық аз қоныстанған аймақтарға кең жолақты интернет қолжетімділігін ұсыну жөніндегі жобалар көптеп іске асырылып жатыр. Экономикалық әлеуетті арттыру мен азаматтардың өмір сүру сапасын жақсарту үшін Қазақстанның әрбір тұрғынын 100 Мбит/с-дан интернетпен қамтамасыз ету мақсаты тұр. Осы орайда өңірдің даму жайында маңызды мағлұматтарды «Керек дерек» айдары арқылы Түркістан облысының тұрғындарының назарына ұсынып отырмыз.
Нақты іске келсек, 176 ауыл абоненттік қолжетімділік технологиясы ретінде «Wi-Fi Hotspot» желісіне қосылды. Осы ауылдарда кеңжолақты қолжетімділік қызметтерімен 17 мыңнан аса адам қамтылды. Қазақстанның ғарыш саласын дамыту тұжырымдамасында еліміздің мүддесі үшін 328 ауылды кеңжолақты интернетке қосу міндеті бар. Ол үшін қазіргі заманғы кеңжолақты геостационарлық емес байланыс желілерінің шешімдерін дамыту қажет. Осыған байланысты «Көктерек» ОКЖ аумағында «OneWeb» геостационарлық емес байланыс желісін қосатын станса құру жұмыстары аяқталып қалды. Коммерциялық қызметтерді ұсынуға техникалық дайындық биылға жоспарланған.
«Ghalam» және ҚҒС алдында тұрған негізгі міндеттердің бірі – СбИК — кешенінің барлық инфрақұрылымын алдағы жобаларға сақадай сай ету. СбИК дегеніміз – Ғарыш аппараттарын құрастыру-сынау кешені. Осы жолда «Ghalam» СбИК операциялық біліктілігі бойынша бірқатар тапсырманы сәтті орындады. Бұл – француз мамандарымен бірлесіп жүргізілген жүйелік-антенналық полигонның сынақ учаскесін орнатудағы техникалық персоналдың да, технологиялық жабдықтың да дайындығының көрсеткіші. Сондай-ақ «Airbus D&S» компаниясымен бірлескен жұмыстардың қорытындысы бойынша 2023 жылы СбИК кешені өнеркәсіптік пайдалануға енгізілді.