«AMANAT» партиясы Түркістан облыстық филиалында Партиялық бақылау комиссиясының кезекті отырысы өтіп, жұмыс жиынында Түркістан облысы көлеміндегі гидротехникалық нысандарда жиналған су деңгейінің мөлшері, ГЭС, су қоймалары мен бөгеттердің, тағы басқа объектілерде қысқы-көктемгі кезеңдегі су тасқынының алдын алу жұмыстары талқыланып, осы бағыттағы өзекті деген мәселелер айқындалды, оларды шешу жолдары қарастырылды. Партияның Түркістан облыстық филиалының төрағасы, облыстық мәслихаттағы партиялық фракцияның жетекшісі Алтынсары Үмбетәлиевтің жетекшілігімен өткен жиынға Түркістан облыстық мәслихатының төрағасы Нұралы Әбішов, партиялық бақылау комиссиясының төрағасы, облыстық мәслихаттың депутаты Алмас Салимов, аталған комиссияның мүшелері, салаға жауапты бірқатар департаменттер мен басқармалардың басшылары, аудан, қала әкімдерінің орынбасарлары, «Қазсушар», «Тұран су» мекемелерінің басшылары қатысты.
Күннің өзекті тақырыбына арналған жиынның жұмысын бастаған партияның өңірлік филиалының төрағасы, Түркістан облысы – су басу қаупі жоғары өңірлердің қатарына жататынын атап өтті. Өңірдегі су қоймалары мен су арналарының ахуалын тұрақты бақылауда ұстау, су басу қауіпі бар аймақтарда өзен жағалауларын бекіту, су өткелдерінің тазалығын қамту, көпірлер мен жолдарды су шайып кету қауіпінен сақтау бағыттарында алдын алу жұмыстарының аса маңыздылығына тоқталды.
«Өздеріңізге белгілі, 2024 жылы елімізде соңғы 80 жылда орын алған ең ірі су тасқыны болды. Қазақстанның су басқан солтүстік, батыс, шығыс аймақтарындағы 10 облыста төтенше жағдай жарияланды. Мыңдаған адам баспанасыз қалды, апат салдарынан қираған инфрақұрылымды қалпына келтіруде ауқымды жұмыстар жүрді. Айтып келмейтін табиғи апаттың алдын алуда, «AMANAT» партиясы Партиялық бақылау Комитетінің тапсырмасына сәйкес, облыс көлеміндегі ГЭС, су қоймалары, өзендер, бөгеттер тағы басқа гидротехникалық нысандарға қатысты қысқы-көктемгі су тасқынының алдын алу бойынша атқарылған жұмыстар және өзекті мәселелерді шешу жолдарын талқылау мақсатында тиісті құзырлы мекемелермен бірлесе арнайы жиын өткізіп отырмыз», — деді Алтынсары Дүйсенбекұлы.
Жиынның күн тәртібіне шығарылған мәселе бойынша Түркістан облысы төтенше жағдайлар департаменті бастығының орынбасары Асхат Ержанов хабарлама жасады. Департамент өкілінің мәлімдеуінше, бүгінгі таңда облыс көлеміндегі 42 су қоймасының орташа толу деңгейі 30 пайыздың шамасында. 10 гидротехникалық нысан жөндеуді қажет ететіні айтылды. Облыстағы барлық су қоймаларының қысқы-көктемгі мезгілдегі су жинау кестесі алдын алу бекітілгені туралы мағлұмат беріліп, көктемгі су тасқыны кезеңінде төтенше жағдайлардың алдын алуға жеке құрамнан 1064 адам, 124 техника, 11 қайық пен 92 мотопомпа дайындыққа келтірілгені мәлімделді. Сонымен қатар, 109 мың дана қап, 1 416 тонна инертті материалдар дайындалғаны, төтенше жағдай қауіпі туындаған жағдайда 141 тонна жанар-жағармай қоры түзілгені жария етілді.
Су тасқынының алдын алуда атқарылған жұмыстар мен дайындық іс-қимылдары жөнінде «Қазсушар» РМК Түркістан облыстық филиалы директорының міндетін атқарушы Жандарбек Бақашбаев есеп берді. Кәсіпорынның өңірлік филиалы 18 су қоймасына, 11 су тоспаларына, жалпы ұзындығы 1299,6 шақырымды құрайтын 104 магистральды каналдарына, сондай-ақ 111 шаруашылықаралық каналдары мен 1679 ішкі шаруашылықаралық каналдарына бақылау жүргізеді. Су қоймаларының толу деңгейін баяндаған кәсіпорын басшысы, су тасқынының алдын алуда Түлкібас, Ордабасы, Отырар, Төлеби аудандарындағы 47 каналдың бас тоспаларын бекіту жұмыстары атқарылғанын мәлімдеді. Инертті материалдар қоры жасақталып, өткен жылы облыс бойынша 306 су нысандарының 681-ден астам шақырымына механикалық тазалау жұмыстары жүргізілгенін атап өтті. Су тасқыны туындаған жағдайда самосвалдар мен эксковаторлар, бульдозерлер, басқа да арнайы техникалар дайындалғанын жеткізді.
Су тасқынының алдын алу жұмыстарының сапасына бақылау жүргізуде, аманаттық өкілдер анықтаған өзекті мәселелер туралы «AMANAT» партиясы Түркістан облыстық филиалының партиялық бақылау жөніндегі инспекторы Асқар Еркінбеков хабарлама жасады. Фотодәлелдермен берілген материалдарда Созақ, Сарыағаш, Қазығұрт, Төлеби, Сауран аудандары мен Кентау қаласына қарасты елді мекендердегі су арналарының қазіргі ахуалы көрсетілді. Партиялық бақылау комиссиясы анықтаған кемшіліктердің қатарында Шолаққорған ауылы тұсындағы дамбаның бұзылуы, осы аймақтағы су шайған жол өткелдері мен жаяу жүргіншілер көпірінің қираған тұстары, жол жиектерінен су ағып асфальт жабындысын бүлдіруі, Балдысу елді мекеніне баратын жол бойындағы көпір тіреуіштерінің астын су шайып кеткені туралы дәйекті дәлелдер ұсынылды.
Сарыағаш ауданы бойынша Келес елді мекенінде «Келес-Гидро-Строй» ЖШС-нің «Дархан» шағын су электр станциясындағы қосымша су жіберу шлюздерінің автоматикасы жоқ екені баяндалды. Шекаралас аймақта орналасқан нысанда су деңгейі көтеріген жағдайда, артық су көлемі дер кезінде босатылмай қалса, халықаралық автожолды және Сарыағаш қаласының жекелеген көшелерін су басу қауіпі бар екені назарға алынды. Сондай-ақ «Сарыағаш-Жылға-Рабат» КХ-11 облыстық маңызы бар автомобиль жолы бойындағы бірнеше жерде орнатылған су өткелдері кеңейтілуі қажет деген нақты ұсыныстар айтылды.
Дәл осы сипаттағы кемшіліктер Қазығұрт ауданының КХ-85 «Ақтас-Рабат» облыстық маңызы бар автожолының Қ.Мәмбетұлы ауылы тұсында, КХ-44 «Жігерген-Көкібел» жолының Қарабастау ауылы аумағында, КХ 29, КХ186 облыстық маңызы бар автомобиль жолдарының Сарапхана ауылы аймағында, КХ-47 «Сынтас-Алтынтөбе» жолының Сынтас ауылы аймағында анықталғаны жария етілді. Сондай-ақ Қақпақ елді мекеніндегі «Заңғар» өзені үстінен өтетін КХ-45 облыстық маңызы бар автомобиль жолының 13-15 шақырымындағы екі көпірдің тіреуіштерін су шайып жатқаны баяндалды. КХ-46 «Тұрбат-Қаржан» облыстық маңызы бар автомобиль жолының Аққұм елді мекені тұсындағы көпір жөндеуді талап ететіні айтылды.
Осы санаттағы жергілікті әкімдіктер мен салалық басқармалар бірлесе қарауы керек мәселелер ретінде Төлеби, Сауран аудандары мен Кентау қаласына қарасты елді мекендердің су нысандарында орын алып жатқан өзекті мәселелер де жан-жақты қарастырылды. Аудан әкімдерінің орынбасарлары, салалық басқарма басшылары анықталған кемшіліктерді ретке келтіруде қолға алған жұмыстары туралы есеп берді.
Жиынның күн тәртібінде қаралған мәселелерді талқылау барысында, облыстық мәслихат төрағасы Түркістан облыстық төтенше жағдайлар департаментіне әр аудан, елді мекен бойынша проблемалық мәселелерді тізбектеп, баяндауды тапсырды. Дер кезінде анықталып, баяндалған кемшілікер төтенше жағдайларды болдырмауға қызмет етеді деп нақты атап көрсетті. Сондай-ақ талқылаулар барысында автомобиль жолдарының астынан өтетін құбырларды уақтылы тазалау, Сауран ауданында Ырмақ су қоймасын жөндеуден өткізу, су қоймаларынан артық су көлемін қабылдайтын каналдардың арнасын тазалап, жағалауларын бекіту, Бәйдібек ауданындағы Қапшағай су қоймасының техникалық дайындығын қадағалау мәселелері жан-жақты қарастырылды.
«Қазгидромет» РМК Түркістан облысы бойынша филиалының директоры Маханбет Жазыхбаев облысымыздағы климаттық өзгерістердің ахуалы мен маусымдық ауа-райының болжамдары туралы ақпарат берсе, бірқатар аудан әкімдерінің орынбасарлары «Қазсушар» кәсіпорнына қатысты сауалдарын қойып, бірлесе жұмыс жүргізудің бағыттарын талқылады.
Жұмыс жиынының қорытындысын шығарған Алтынсары Үмбетәлиев, су тасқынын болдырмау – алдымызда тұрған басты маңызды мәселе екенін тағы да еске сала отырып, бұл бағытта облыстық департаменттер мен басқармалар, аудан, қала әкімдері, депутаттық корпус, партия филиалы, су көздеріне жауапты кәсіпорындар бірлесе іс-қимыл жүргізуі тиіс екенін айтты. Бүгінгі жиын барысында айтылған барлық ұсыныстар партиялық бақылау комиссиясы отырысының хаттамалық тапсырмасына енгізілетінін, олардың орындалуы бойынша партия филиалына сапалы дайындалған ақпарат материалдарын ұсынуды тапсырды.
«AMANAT» партиясы Түркістан облыстық филиалының баспасөз қызметі