Түркістан облысында ерекше қажеттіліктері бар азаматтарды қолдау шаралары жүйелі түрде жүзеге асып келеді. Бұл жолы облыстық прокуратураның бастамасымен Түркістан қаласындағы «Самғау» оңалту орталығында ашық қабылдау мен құқықтық түсіндіру кездесуі өтті.
Кездесуге Түркістан облыстық прокуратурасының өкілдері, атап айтқанда басқарма аға прокуроры Серікболсын Заурбеков пен облыс прокурорының көмекшісі Дидара Абдрасилова қатысып, ерекше қажеттіліктері бар азаматтарды жеке қабылдап, олардың құқықтық сауалдары мен әлеуметтік мәселелерін тыңдады.
Кездесу барысында тұрғындар әлеуметтік төлемдер мен жәрдемақылардың қолжетімділігі, тұрғын үйге кезекке тұру рәсімі, білім мен денсаулық сақтау қызметтерінің инклюзивтілігі, қоғамдық көлікпен тегін немесе жеңілдікпен жүру құқығы сияқты мәселелерді көтерді. Бұл – отбасылар мен қоғамның осал топтарына көрсетілетін нақты қамқорлықтың көрінісі.
Азаматтарға нақты заңдық түсініктемелер беріліп, бірнеше мәселе бойынша тиісті органдарға ресми сұрау салу және бақылау жұмыстары басталатыны айтылды. Облыс прокуратурасы «заң мен тәртіп» қағидаты негізінде жұмыс істеп, әлеуметтік әлсіз топтардың құқықтарын қорғауға басымдық беруде.
Айта кетейік, Түркістан облысы бойынша бүгінде 101 557 мүмкіндігі шектеулі азамат тіркелген. Бұл санның артында мыңдаған отбасының тағдыры, өмір сүру сапасы мен келешекке деген сенімі жатыр. Сондықтан олардың құқығын қорғау – отбасылық-әлеуметтік саясаттың маңызды бағыты.
Прокуратура тарапынан жүргізілген тексеріс нәтижесінде «автомобиль көлігі туралы» заң талаптарының орындалмауына байланысты Жетісай, Мақтаарал аудандары мен Кентау қаласында 3263 мүмкіндігі шектеулі азаматтың құқығы қалпына келтірілді. Бұл – әлеуметтік әділеттіліктің орнығуы мен құқықтық мемлекеттің қағидаттарының нақты орындалуының дәлелі.
Мұндай ашық кездесулер халық пен билік арасындағы сенімді нығайтуға, әлеуметтік әлсіз топтардың даусын естуге, отбасылық тұрақтылық пен қоғамдық келісімді қамтамасыз етуге бағытталған.
«Самғау» орталығының базасында өткен қабылдау – ерекше қажеттіліктері бар азаматтарды қоғамнан шеттетпеудің, қайта олардың өмірге толық қатысуына мүмкіндік жасаудың жарқын мысалы.
Қорыта айтқанда, Түркістан облысында мүмкіндігі шектеулі азаматтарды қорғау мен қолдау – отбасылық және гендерлік саясатты іске асырудың, әлеуметтік теңдік пен құқықтық мемлекет қағидаттарын орнықтырудың жарқын үлгісі. Прокуратура мен әлеуметтік мекемелердің бірлескен жұмысы еліміздегі «халық үніне құлақ асатын мемлекет» тұжырымдамасының өңірлік деңгейде жүзеге асып жатқанын көрсетеді.
Әлеуметтік әділет, қолжетімді орта мен құқықтық сауаттылық – Түркістан өңірінің адамға бағытталған даму саясатының өзегі.