Балаларға арналған әрбір бастамада, әрбір бағдарламалық құжатта қоғам мүшелерінің белсенді қатысуына мән беріліп, ортақ жауапкершілік қағидаты бекем орныққан. Балалар – қоғамның ең әлсіз әрі ең қымбат бөлігі. Олардың құқықтарын қорғау, қауіпсіздігін қамтамасыз ету және жан-жақты дамуына жағдай жасау – тек ата-ананың немесе мемлекеттің ғана емес, тұтас қоғамның азаматтық әрі адамгершілік міндеті. Түркістан облысында бұл ұстаным нақты іспен дәлелденіп отыр.
Өңірде бала құқықтарын қорғауға бағытталған жұмыстарға волонтерлік ұйымдар, үкіметтік емес бірлестіктер, БАҚ өкілдері мен білім беру мекемелері белсенді араласуда. Мысалы, мектептер жанынан құрылған қамқоршылық кеңестер мен ата-аналар комитеттері балалардың қауіпсіздігіне, оқу-тәрбие процесіндегі әділеттілікке, әлеуметтік жағдайы осал отбасылардан шыққан балалардың құқықтарының сақталуына атсалысуда. Олар мектеп пен ата-ана арасындағы алтын көпірге айналып, балаға бағытталған қолдау мәдениетін дамытуда үлкен рөл атқарып келеді.
Қоғамда балаға жанашырлықпен қарауды қалыптастыру мақсатында облыс көлемінде «Бала құқығы – адам құқығы» ұранымен түрлі ақпараттық науқандар ұйымдастырылуда. Бұл бастамалар аясында мектептерде, мәдениет үйлерінде және орталық алаңдарда ашық есік күндері, құқықтық форумдар, тренингтер мен дөңгелек үстелдер өткізіледі. Онда құқық қорғау саласының мамандары, ұстаздар, психологтар мен әлеуметтік қызметкерлер балалар мен олардың ата-аналарына құқықтық білім беріп, нақты көмек көрсету тетіктерімен таныстырады.
Волонтерлік қозғалыстар да бала құқығын қорғау бағытында белсенді жұмыс жүргізуде. Әлеуметтік желілерде балаларға қатысты зорлық-зомбылық, кибербуллинг, ерте жүктілік, нашақорлық пен суицидтің алдын алу туралы ақпараттық бейнероликтер, анимациялық роликтер, танымдық инфографикалар кеңінен таралуда. Бұл – қоғамда балаға қауіпсіз кеңістік қалыптастыру жолындағы маңызды әрекеттердің бірі.
Медиа ресурстар да қоғам назарын бала тақырыбына бағыттап, өзекті мәселелерді кеңінен талқылап келеді. Жергілікті газет-журналдар мен телеарналарда балалардың құқықтарын, қауіпсіздігін және дамуын қамтитын арнайы айдарлар ашылып, нақты оқиғалар мен тәжірибелер мысалында жауапкершілікке шақыру үрдісі нығаюда.
Бұл кешенді жұмыстың басты мақсаты – балаға жан-жақты қолдау көрсету мәдениетін қоғамдық санаға бекіту. Жетім, мүгедек, аз қамтылған отбасындағы немесе зорлық көрген балаларға көмек көрсету – бүкіл қоғамның ар-ожданы мен парасатының көрсеткіші.
Сондықтан Түркістан облысында қалыптасқан тәжірибе айқын көрсетіп отырғандай, бала мәселесіне бейжай қарамау – кез келген адамның азаматтық ұстанымының өлшемі. Болашақ ұрпақтың амандығы мен дамуы тек мемлекеттік құрылымдардың емес, әрбір азаматтың күнделікті шешімдеріне, қарым-қатынасына және іс-әрекетіне тікелей байланысты. Тек осындай ортақ міндет пен жұмыла атқарылған іс арқылы ғана біз балаға қауіпсіз, әділетті әрі бақытты қоғам құра аламыз.