Түркістан қаласында денсаулық сақтау саласының инфрақұрылымын дамытуға бағытталған маңызды жобалардың бірі – 570 төсек-орынға арналған заманауи көпбейінді аурухананың құрылысы қарқынды жүргізілуде. Ауқымды медициналық кешеннің бой көтеруі өңір тұрғындарына көрсетілетін медициналық көмектің сапасы мен қолжетімділігін арттырып, денсаулық сақтау жүйесінің материалдық-техникалық әлеуетін жаңа деңгейге көтеруге мүмкіндік береді. Бүгінде нысандағы құрылыс-монтаждау жұмыстарының 88 пайызы орындалған.
Түркістан облысының әкімі Нұралхан Көшеров құрылыс алаңына арнайы барып, медициналық кешеннің салыну барысымен танысты. Сапар барысында облыс басшысы мердігер мекеме өкілдерімен кездесіп, атқарылып жатқан жұмыстардың жай-күйін, құрылыс сапасын және белгіленген кестеге сәйкестігін тексерді. Сонымен қатар нысандағы жұмыстардың қарқынына назар аударып, құрылысты уақытылы аяқтау үшін жауапты тұлғаларға бірқатар нақты тапсырмалар берді.
Облыс әкімі денсаулық сақтау саласын дамыту, медициналық мекемелердің материалдық-техникалық базасын нығайту және халыққа сапалы медициналық қызмет көрсету мүмкіндігін кеңейту өңірдегі басым бағыттардың бірі екенін атап өтті.
– Денсаулық сақтау саласының материалдық-техникалық базасын нығайту және тұрғындарға сапалы медициналық қызметтің қолжетімділігін арттыру – басты міндеттеріміздің бірі. 570 төсек-орынға арналған бұл көпбейінді аурухана өңір медицинасының әлеуетін арттыруға мүмкіндік береді. Сондықтан құрылыс жұмыстарының сапасына ерекше мән беріп, нысанды белгіленген мерзімде аяқтауымыз қажет. Сондай-ақ нысанның заманауи медициналық құрал-жабдықтармен толық қамтылуы маңызды. Мердігер ұйым мен жауапты басқармаларға осы бағыттағы жұмыстарды қатаң бақылауда ұстап, барлық талаптың сақталуын қамтамасыз етуді тапсырамын, – деді Нұралхан Көшеров.
Ауқымды медициналық кешен 15,6 гектар аумақта орналасқан. Ғимараттың жалпы ауданы 83 276,96 шаршы метрді құрайды. Нысанның ауқымы мен жобалық қуаты оның өңірдегі ірі медициналық орталықтардың біріне айналуына негіз болады. Құрылыс жұмыстарын жүргізіп жатқан бас мердігер – «YDA INSAAT SANAYI VE TICARET ANONIM SIRKETI» акционерлік қоғамы.
Қазіргі уақытта құрылыс-монтаждау жұмыстарының 88 пайызы аяқталған. Жобаны белгіленген мерзімде жүзеге асыру мақсатында құрылыс алаңында 300-ден астам жұмысшы мен маман еңбек етуде. Олар ғимараттың құрылыс жұмыстарын аяқтау және нысанды алдағы пайдалануға дайындау бағытында жұмыстар жүргізіп жатыр.
Жоспарға сәйкес, аурухананың құрылысын биыл толық аяқтау көзделген. Ал 2027 жылы медициналық мекемені заманауи құрал-жабдықтармен қамтамасыз ету жұмыстары жүргізіледі. Бұл кезеңде аурухананың медициналық қызмет көрсетуге қажетті техникамен жабдықталуына басымдық беріледі. Өйткені медициналық инфрақұрылымның тиімді жұмыс істеуі ғимараттың сапалы салынуымен қатар, оның заманауи диагностикалық және емдеу құрылғыларымен толық жасақталуына да тікелей байланысты.
Жаңа медициналық кешен іске қосылғаннан кейін Түркістан облысы тұрғындары үшін сапалы медициналық көмектің қолжетімділігі арта түседі. Әсіресе, күрделі медициналық қызметтерді өз өңірінде алу мүмкіндігі кеңейіп, заманауи диагностика мен емдеу бағыттарын дамытуға жағдай жасалады. Сонымен бірге көпбейінді аурухана денсаулық сақтау саласындағы қызмет көрсету мүмкіндіктерін арттырып, халыққа көрсетілетін медициналық көмектің сапасын жақсартуға ықпал етеді.
Жалпы, Түркістан қаласында салынып жатқан 570 төсек-орындық көпбейінді аурухана – өңірдің әлеуметтік инфрақұрылымын нығайтуға арналған стратегиялық маңызы бар жобалардың бірі. Оның пайдалануға берілуі облыстағы медициналық қызмет көрсету жүйесін жетілдіруге, тұрғындардың денсаулығын қорғау мүмкіндіктерін кеңейтуге және денсаулық сақтау саласының әлеуетін арттыруға тың серпін бермек.